16 იან 2020 20:33 1021

"ყველაფერს გავაკეთებთ, რომ ამ ბოროტ ძალას, "ნაციონალურ მოძრაობას~ კოვზი ნაცარში ჩაუვარდეთ!"

 

"ივანიშვილის ქველმოქმედება მე ჩემს თავზე გამომიცდია, ჩემს ოჯახზე და ვიცი"

 

„ალია“ ესაუბრება სამოქალაქო აქტივისტს, "ქართული ოცნების" მხარდამჭერს, შაკო კუჭაშვილს.

 

– ცოტა ხნის წინ სოციალურ ქსელში წერდი, რომ „ქართული ოცნების“ დაცვა და მხარდაჭერა სულაც არ არის კომფორტიო, რას გულისხმობდი?

– პირველი ის, რომ სახელისუფლო პარტიაა და დიდი პასუხისმგებლობაა „ქართული ოცნების“ მხარდაჭერა, იმიტომ, რომ ყველაზე ბევრი კითხვა არსებობს ამ პარტიასთან დაკავშირებით, მეორე, დისკომფორტია იმით, რომ ოპოზიციის მხარდამჭერები საკმაოდ აგრესიულად უყურებენ ამ პარტიის წარმომადგენლებს და ხშირ შემთხვევაში აგრესია გადაიზრდება ხოლმე ბულინგში.

– ამას არც თქვენ აკლებთ.

– ეს არის ცუდი, რომ შემდგომში გვიწევს მოხდეს ურთიერთბულინგი და უკვე ცუდისკენ მივდივართ. არცერთი მხარე არ თმობს და საკმაოდ საშიში თამაშია ქვეყნისთვის.

– თქვენი აზრით, უნდა დათმოს რომელიმემ?

– უნდა დათმოს. ის პოლიტიკური პირები, რომლებიც დამოუკიდებლობის მანძილზე, ათეულობით წელია საქართველოს ჭამენ -  ხალხმა უნდა „დაიკიდოს“, ადამიანების შერიგება უნდა მოხდეს. მერე, იდეების კონსოლიდაციაც მოხდება. ისედაც ცოტანი ვართ და ყველაფერზე თუ ერთმანეთი დავჭამეთ, არ გამოვა. პირადად მე, მიუხედავად იმისა, რომ ბევრი ნაციონალისთვის მიგინებია, არ არის ჩემთვის კომფორტი გინება და შეურაცხყოფა, უბრალოდ, ეს თავდაცვაა.

– ხალხი შერიგდესო, რომ ამბობ, ის ხალხი უნდა შერიგდეს, ვინც უპარტიოა, ნაცები და ქოცები უნდა შერიგდნენ, თუ ვინ უნდა შერიგდეს, როგორ წარმოგიდგენია?

– ჩვენ ზოგადად ქართველები კავკასიაში გამოვირჩევით ამპარტავნებით, კი გვწყინს, ამას რომ ვიღაცები გვახსენებენ, მაგრამ ასეა. შენ როცა 30 წელია დამოუკიდებელი ხარ და გინდა ერთი ხელის მოსმით იყო ამერიკის და ევროკავშირის და სხვა ბობოლების დონეზე, ეს უკვე არის ამპარტავნობა. ძალიან ახლო წარსულში, ერთმანეთს ესროდნენ ძმები, ზუსტად პოლიტიკური კუთვნილების გამო, უნდა გააცნობიერო, რომ ხარ იმ ქვეყნის მოქალაქე, სადაც ყველაფერი წყდება სენსიტიურად და უნდა ეცადო შერიგებისკენ გადადგა ნაბიჯები. არაპოპულარულია ახლა რასაც ვამბობ, მაგრამ მე მჯერა, რომ ეს არის სიმართლე და თუ ასე ვივლით, რაიმე შედეგს მივაღწევთ. სოციალური ქსელი ძალიან კარგად წარმოაჩენს რეალურად რა ხდება ქვეყანაში, აშშ–ში ტრამპისტებს სულ უტევენ, ჩვენთანაც, ბიძინისტებს სულ გვიტევენ ლიბერალები. მაგრამ აშშ–ში მწყობრში არის ინსტიტუტები და არ ექმნება საფრთხე.

– არ დაგავიწყდეს, რომ შენ ხარ ადამიანი, რომელიც წახვედი და მაჩალიკაშვილის გვერდით გაშალე კარავი, არ გაგიშლია კარავი რომელიმე ოპოზიციის პარტიის წინ, არ გაგიშლია ხელისუფლების წინ, გაშალე მაჩალიკაშვილის კარავთან.

– გამოხატვის თავისუფლება არ უნდა იყოს აღქმული, როგორც ვინმეს წინააღმდეგ რაიმეს გაკეთება.

– შერიგება არ გიცდია, შენ მიხვედი რომ ძალა დაანახო, ასე აღიქვა ხალხმა.

– არანაირი ძალა არ დამინახვებია, იქ ჩემი კარავი არ არის მხოლოდ, იქ არის ოპოზიციის კარვებიც, `სირცხვილიას~ კარვებია იქ.

– რას ითხოვდი?

– ვითხოვდი იმას, რასაც ვამბობდი, რომ ნუ ლაპარაკობს „ნაცმოძრაობა“ საზოგადოების უმრავლესობის სახელით.

– მაგრამ არ ითხოვდი მაჩალიკაშვილის საქმის დასრულებას.

– არ ვითხოვდი, მაგრამ რატომ არის ეს ცუდი.

– იმიტომ, რომ შერიგებაზე ლაპარაკობ...

– რუსთაველი არის ქვეყნის საკუთრება, ჩემი აზრით იქ კარვის გაშლა იყო შერიგებისკენ ნაბიჯი, იქ არანაირი კონფრონტაციისთვის არავინ არ მისულა, იქ მივედით იმისთვის, რომ რუსთაველი არის ხალხის, ყველასთვის. ჩვენ არანაირად სიტუაციის დაძაბვისთვის იქ არ მივსულვართ, როცა მოგვეცემა საშუალება აუცილებლად დავბრუნდებით.

– თუმცა სიტუაციის კონფრონტაცია მოხდა.

– მოხდა ჩვენთვის, ჩვენი მოძრაობისთვის `შევინარჩუნოთ სიცოცხლე~ აბსოლუტურად უცხო ადამიანების მხრიდან, ჩვენ არ ვიყავით არცერთ კონფლიქტში ჩართული.

– და თქვენ ამის შემდეგაც გააგრძელეთ იქ ყოფნა. მთავარი პრინციპი იყო ის, რომ რუსთაველია ყველასთვის?

– რუსთაველი არის ყველასი და ოპოზიციის წევრებს არა აქვს საზოგადოების უმრავლესობით ლაპარაკის უფლება, წლების მანძილზე რუსთაველზე წყდებოდა ჩვენი ქვეყნის ბედი და შესაბამისად, იქ უნდა იყოს გამოხატული საქართველოს მოსახლეობის ნებისმიერი ნაწილის ოპოზიციონერობა. ეს არ იყო ცუდი ამბავი.

– ანუ ხვალ და ზეგ ყველას შეუძლია რუსთაველზე დადგას კარავი.

– რატომაც არა. კარავი არ არის მარტო, კარავი შეიძლება იყოს  აზრის გამოხატვის ერთ-ერთი ფორმა. ეს არ არის რეალურად ცუდი ამბავი, ვიღაცები ცდილობდნენ ცუდი იარლიყი მოეწებებინათ, მაგრამ არც მათ გამოუვიდათ ეს ამბავი.

– მინდა გითხრათ, რომ გამოუვიდათ, მაგალითად ია მეტრეველს ხმა არ ამოუღია, არ დამდგარა შვილმოკლული მამის გვერდით...

– ია მეტრეველი არ არის ჩემი მოძრაობის წევრი. მე არ ვიცი გამოსვლას რას უწოდებ, მაგრამ ის, რომ იყო მცდელობა ჩვენ იქ გამოვჩენილიყავით როგორც აგრესიულ ჯგუფად, ეს ამბავი „ნაცმოძრაობას“ არ გამოუვიდა. ჩვენ აგრესიულ ჯგუფად არ გამოვჩენილვართ. მე და ლიკუნაც, ვისთან ერთადაც კარავში ვიყავი, ინტერვიუებში ვცდილობდით მაქსიმალურად დაბალანსებული ვყოფილიყავით.

– მე ვიგულისხმე ის, რომ თქვენ გამოჩნდით როგორც პირდაპირი დაპირისპირება მაჩალიკაშვილთან.

– ეს გამოგვაჩინა რამდენიმე სააგენტომ, თორემ ესე არ იყო რეალურად, იქ არ იყო მხოლოდ მაჩალიკაშვილის კარავი, „სირცხვილიას“ კარვები იყო, „შეცვალეს“ კარვებიც და „ნაცმოძრაობის“ „ძალა ერთობაშია“ კარვები. ეს არის „მთავარის“ ხელწერა, ჩემდა სამწუხაროდ, თორემ ის არ იყო მაჩალიკაშვილის წინააღმდეგ მიმართული ქმედება.

– მაჩალიკაშვილიც რომ მის წინააღმდეგ მიმართულად მიიჩნევდა კარვის დადგმას?

– არ მინდა რამენაირად ჩემი მხრიდან პოლემიკაში შევიდე მაჩალიკაშვილთან, ვთვლი, რომ არის გამწარებული მამა და ვთვლი, რომ იმან შეიძლება გაიგოს არასწორედ. თორემ ჩვენი არცერთი განცხადება არ ყოფილა მაჩალიკაშვილის წინააღმდეგ და რატომ თვლიდა ის ასე, არ ვიცი. მაგალითად, როცა მაჩალიკაშვილმა გვითხრა, რომ თქვენი კარავი ეფარება ხელმოწერების მოგროვებას, მაშინვე, ოპერატიულად გადავიტანეთ კარავი. იქ მხოლოდ მაშინ დაიძაბა სიტუაცია, რაც აქტივისტები ჩაერივნენ.

– შენ საუბრობდი შერიგებაზე, თუმცა, „ოცნების“ მხარდამჭერები სწორედ იმას ამბობენ, რომ კოჰაბიტაცია იყო შეცდომა. რამდენად არის შერიგება იგივე - რაც კოჰაბიტაცია და ამ შენს იდეას რამდენად გამოუჩნდება მხარდამჭერი?

– „ქართული ოცნების“ წარმომადგენლებიც გამაკრიტიკებენ, მაგრამ ჩემი მოკრძალებული აზრით, როგორც ახალგაზრდა, ვთვლი, რომ კოჰაბიტაცია არ იყო შეცდომა. თუ გვინდა ცივილიზებული მომავალი, ევროპული მომავალი, ჩვენ უნდა ვეცადოთ ადამიანებთან მშვიდობიან თანაცხოვრებას. იმ ვითარებაში, როდესაც 2013 წელს „ქართულ ოცნებას“ და ივანიშვილს ჰქონდა დიდი პოლიტიკური თაფლობის თვე ამომრჩეველთან და არავინ აკრიტიკებდა, აი იმ პერიოდში შესაძლებელი იყო „ნაცმოძრაობა“ საერთოდ აკრძალულიყო და არავინ ქუჩაში გამომსვლელი არ იყო. დღეს ის ადამიანი ლაპარაკობს კოჰაბიტაციაზე, ვინც ვერ აცნობიერებს რა გამოწვევების წინაშე დგას ქვეყანა. დღეს უკვე კოჰაბიტაციაზე ლაპარაკი არის გვიანი, 2012 წელში რომ ეს მომხდარიყო, გამკრიტიკებელი არავინ იყო, ვერც დიპლომატთა კორპუსი გააკრიტიკებდა იმიტომ, რომ ამომრჩევლის ნება იყო  ნაცმოძრაობა დასჯილიყო სათანადოდ. ახლა ბუნებრივია, იგივეს ვერ გააკეთებენ, კი ამბობენ კოჰაბიტაცია უნდა დასრულდესო, მაგრამ არავითარი ქმედითი ნაბიჯი ამას არ მოჰყვება და ამაზე არც არის გათვლა.

– რატომ არ დაასრულა 2012-13 წლებში ივანიშვილმა „ნაც. მოძრაობა?“

– ყველას გვახსოვს 2013 წელს სააკაშვილი იყო პრეზიდენტი, ივანიშვილი პრემიერი, ამ დროს, კოჰაბიტაცია იყო აბსოლუტურად ბუნებრივი მოვლენა და შენ, როცა ხარ ხელისუფლებაში, ვერცერთ ევროპელს ვერ აუხსნი, პრეზიდენტი უნდა დამეჭირაო. ჩემთვის პირადად, არ იქნებოდა სწორი პრეზიდენტის დაჭერა და არც იმას ვთვლი, რომ კოჰაბიტაცია არის  საშინელება და უნდა დაიხატოს სიძულვილის ხატი.

– „ნაც. მოძრაობის“ სიძულვილის ხატს კარგად იყენებს „ქართული ოცნება“ და ზარდიაშვილები ჰყავდათ და ჰყავთ პარლამენტში. ქალაქს ჰყავს მერი, რომელიც ძალიან კარგ ურთიერთობაში იყო სააკაშვილთან და მშვენიერი ბიზნესები ჰქონდა ნაცმოძრაობის დროს... ამის პარალელურად, სარალიძის აქციაზე ვერ გავალთ, მანდ ნაციონალები დგანანო, მაჩალიკაშვილთან ვერ გავალთ, მანდაც ნაციონალები დგანანო და იმას არ ამბობენ, მაგალითად, მე არ ავირჩევ მდინარაძეს იმიტომ, რომ მაგის გვერდით „ნაციონალები“ დგანანო. 

– მდინარაძეს და კალაძეზე ვერანაირ კომენტარს ვერ გავაკეთებ, ჩემთვის ერთ–ერთი ყველაზე დადებითი პოლიტიკოსები არიან. კალაძე იყო ერთ–ერთი პირველი სპორტსმენი, რომელმაც 2008 წელს პირდაპირ უთხრა სააკაშვილს, რომ გირგვლიანის საქმეს პასუხი უნდა გაეცეს და იქნეს გამოძიებული. 2007 წლამდე ივანიშვილიც აქებდა „ნაცმოძრაობას“ რეფორმების განხორციელებაში. 2007 წლის შემდეგ ივანიშვილმა შეწყვიტა დაფინანსება და კი შეეტყო როგორ განვითარდა მოვლენები და როგორი პოლიტიკური მონსტრი გახდა ნაცმოძრაობა თავისი არსით, სააკაშვილი ქვეყანას მართავდა ავტოკრატიული მეთოდით.

– ყველა გახმაურებული მკვლელობა და დარბევა მოხდა ზუსტად იმ დროს, როცა ივანიშვილი აფინანსებდა იმ სისტემას.

– ამ წლებში იყო ნაცმოძრაობის სტარტი და მაშინ ნაცმოძრაობას ძალიან დიდი რეიტინგი ჰქონდა. რატომ არ გამოჩნდა ივანიშვილი ამ პერიოდში, ეს უნდა კითხოთ ივანიშვილს, მაგრამ აფინანსებდა იძულებით გადაადგილებულ პირებს, აფინანსებდა საქართველოში პოლიციას, ფორმებს, ჯარისკაცებს, ეს ადამიანები დღეს რომ გველაპარაკებიან იმაზე, აქაოდა ივანიშვილი აფინანსებდა ნაცმოძრაობას და ნაციონალი გამოდისო, არა, ივანიშვილი აფინანსებდა სახელმწიფოს.

– თუ სახელმწიფოს აფინანსებდა და კავშირში არ იყო პოლიტიკასთან, მაშინ გაეგრძელებინა, ხალხმა რა დააშავა. კონკრეტულად მე თუ მეხმარები, რა შუაშია ვინ არის ჩემი პრეზიდენტი.

– ივანიშვილს არასოდეს შეუწყვეტია ქველმოქმედება. სახელმწიფო სტრუქტურების დაფინანსება მაშინ შეწყვიტა, როცა დაინახა ძალოვანი სტრუქტურები იქცეოდნენ ცუდად, მაშინ მიიღო ეს გადაწყვეტილება, მაგრამ ქველმოქმედება არ შეუწყვეტია. მე ჩემ თავზე გამომიცდია, ჩემს ოჯახზე და ვიცი. მას ქველმოქმედება ქვეყნის წინაშე არასოდეს შეუწყვეტია.

– რას გულისხმობ?

– მე ვარ 1991 წლის სტიქიით დაზარალებული ოჯახიდან, ერთ–ერთი ვიყავი, რომელსაც ივანიშვილმა აუშენა სახლი საჩხერეში, ასობით ადამიანს აუშენა სახლი. ალბათ საჩხერეში ნამყოფიც ხარ, მაგრამ რომ დაიარო საჩხერე და იკითხო, ვინ არის ივანიშვილი, ყველაზე კარგად იქ აგიხსნიან, ვინ არის. საჩხერლებს თავი დაანებე, რაც დღეს კეთდება ივანიშვილისა და ფონდი „ქართუს“ ფონდით, სასწაული მასშტაბით. ჩავიდეთ აბასთუმანში, მეგობრები მირეკავენ, სასწაული აღმშენებლობა მიმდინარეობს, ასევე წყალტუბოში.

– წამო, გურიაში ჩავიდეთ და განახებ, რომ ყველაფერი უკან–უკან მიდის, აჭარაში ჩავიდეთ.

– გურიაში ყველაზე კარგი მაგალითი არის ბლექსი არენა, საოცარი რამეა.

– სადაც გურულების გარდა დადის ყველა.

– ტურისტული პოტენციალი გურიას და აჭარას რომ აქვს, ისეთი არსად არ არის. აქეთა ფლანგზე ჯანდაცვის და ტურიზმის განვითარების თვალსაზრისით, აბასთუმანი და წყალტუბოს ამბავი არის საოცარი, ამის კრიტიკა წარმოუდგენელია „ნაცმოძრაობის“ მხრიდან! როგორ შეიძლება კაცი, რომელიც ქვეყნის საქმეს აკეთებს რეალურად აბასთუმანშიც და წყალტუბოშიც, მხოლოდ იმის გამო, რომ ის პოლიტიკურად არ მოგწონს - ლანძღო? როგორ შეიძლება ამ კაცის შვილს, რომელიც ბრაზილიაში რიცხავს ფულს, მომაკვდავი ხალხისთვის, მერე ავსტრალიის დახმარების ხერხებს ეძებს  - იმის გამო, რომ ბიძინა არ მოგწონს, უკარნახო, რაში რა ფული დახარჯოს. ვისი რა საქმეა რაში დახარჯავს ბერა ივანიშვილი საკუთარ ფულს.

– ბერა ივანიშვილმა ღიად გამოხატა ბრაზილიის და ავსტრალიის დახმარების სურვილი მაგრამ ბერას არასოდეს უთქვამს, რომ საქართველოს რომელიმე რეგიონს უნდა რომ დაეხმაროს - მაგალითად, ბორჯომის გადამწვარ ტყესო, ამას ამბობდნენ ოპონენტები.

– ქველმოქმედება არის ჰუმანური აქტი. რაც შეეხება ბორჯომს, როგორც ვიცი „ქართუ ფონდმა“ ბორჯომის ამბავში, რაღაც წვლილი შეიტანა, ასე მახსოვს, მაგრამ პერსონალურად ბერა ივანიშვილისგან არ მახსენდება. ის, რომ მსოფლიოში მიმდინარე რთულ პროცესებში მონაწილეობას იღებს ქართველი, რომელსაც აქვს ბევრი ფული პოლიტიკური კუთვნილების გამო არ უნდა გავაკრიტიკოთ მისი ქველმოქმედება. ქველმოქმედების კრიტიკა საერთოდ არ მესმის, ვერ ვიგებ, რა დონის სიბეცე და სიბნელეა, არ მესმის.

– ჩვენ გვირეკავდა მოსახლეობა ბაკურიანი-გუდაურიდან წყლის პრობლემაზე და ყველა გვიყვებოდა ერთს: გახშირებული მშენებლობები, გაჩეხილი ტყეები, კი არ ირგვება, იჩეხება. ასევე, ჩათვალეთ, რომ ტურისტული სეზონი ჩაგვივარდაო.

– არც ეგრეა საქმე, სასტუმროების მხოლოდ 15 პროცენტს არ მიეწოდებოდა წყალი, რამდენადაც არის დადასტურებული ინფორმაცია. მაგრამ ის, რომ ვიღაცები, თურმე, მკაცრ ზამთარს ელოდებოდნენ და ამის იმედად იყვნენ, მე თვითონაც მეცინება ამაზე, „ქართული ოცნების“ პრობლემა  არის ის, რომ სანამ რაღაცა რეალურად არ მოხდება, რაღაცაში არ ჩაიჭრებიან, მანამდე არ ერევიან. მათ უჭირთ კრიზისების მართვა, ვწუხვარ, მაგრამ ასეა.

– იმიტომ, რომ მათ აქვთ კადრების პრობლემა?

– შესაძლოა. ვერასდროს ვერ შეიტან კახა კალაძის კომპეტენციაში ეჭვს, თბილისი ემსგავსება ნელ-ნელა ევროპულ ქალაქს.

– მაგალითად?

– მაგალითად, გაიარეთ ათონელზე, ორბელიანის მოედანი ნახეთ, ჭავჭავაძის გამზირი.  

– მაგალითად, საბურთალოზე მილიონნახევარი დაჯდა კანდელაკის ქუჩის რეაბილიტაცია და ორ კვირაში თავიდან აყარეს, ტენდერები ცხადდება ერთი და იგივე ადგილზე რამდენჯერმე იმიტომ, რომ კომპანია სამუშაოს არ ასრულებს და ამას ყურადღებას არავინ აქცევს. ნაძვისხე კი გვაქვს მილიონიანი, თუმცა ისიც ბევრს არ მოსწონს...

– სიენენმა დაწერა თავის ვებ–გვერდზე, რომ თბილისში საშობაო არდადეგები იქნება საუკეთესო, აქ ვიღაც ნანუკა ჟორჟოლიანი და დოლენჯაშვილი რას იბოდიალებს, ძალიან არ მაინტერესებს. მშვენიერი ნაძვისხეა, განათება შეიძლება იყოს ძვირი, თორემ ნაძვისხე მაგდენი არ ეღირებოდა.

– მიუხედავად იმისა, რომ ხელისუფლება საუბრობს ეკონომიკის ზრდაზე - ჩემს გვერდით სიღატაკემ ყველა ოჯახში იმატა. „ოცნების“ მხარდამჭერთა უმეტესობა ამას ვერ ხედავს, შენ თუ ხედავ?

– ყველაფერი შედარებითია, გაჭირვებული ადამიანები რომ ჩემს გარშემო არის, ამის არ აღნიშვნა არის პოლიტიკური სიტუტუცე, როგორ შეიძლება „ქართული ოცნების“  მხარდამჭერმა კომფორტულად იგრძნოს თავი მაშინ, როცა ქვეყანაში არის ათეულობით გაჭირვებული. მე პირადად რადგან ვარ „ქართული ოცნების“ მხარდამჭერი მორალური უფლება არ მაქვს ვთქვა, რომ ყვავის ქვეყანა, მაგრამ ის, რომ გაჭირვებული ადამიანების რაოდენობამ „ნაცმოძრაობის“ პერიოდთან შედარებით გაიზარდა, ეს არის უკვე სიცრუე. ეს არის ფაქტებით სპეკულირება და სტატისტიკის ომი, რასაც აწარმოებს ოპოზიცია ხელისუფლების მიმართ. როცა ამბობენ ნაციონალები 700 ათასი ბავშვი შიმშილით იხოცებაო, ეს არის მანიპულირება გაჭირვებული ადამიანებით. როგორ უნდა იკადრო ის, რასაც მაგალითად გიორგი ვაშაძე კადრულობს, შედის ბაზარში, ესალმება ხალხს, ხელს ართმევს, ხელზე კოცნის, გამოდის იქიდან, ჟურნალისტს აძლევს ინტევრიუს, ვაი ხალხს როგორ უჭირს და მერე წაეთრევა კაზინოში, ცნობილი ფოტოა, როგორ გდია გიორგი ვაშაძე კაზინოში. ეს არის ოპოზიციის სახე, ოპოზიციის სახე არის ტყუილი.

არ უნდა გიხაროდეს, რომ ოპოზიცია არის ბანძი და მატყუარა, ქვეყნის კარგი ოპოზიცია არის აუცილებელი.

– დღევანდელი ოპოზიცია რომ იყოს უფრო ძლიერი, უკვე მესამე წელია აღარ იქნებოდა „ქართული ოცნების“ ბუნდღა, მაგრამ ინტერვიუს დასაწყისში ამბობ, რომ უნდა შევრიგდეთ და შენ ამ ხალხთან გინდა შერიგება?

– მე მინდა შერიგება მათ მხარდამჭერებთან და უბრალო ადამიანებთან, თორემ ოთარ კახიძისნაირ ნაძირალა პოლიტიკოსებთან შერიგება დაუშვებელია. ხალხმა უნდა გავაცნობიეროთ ის, რომ ჩვენია ეს ქვეყანა.

– შერიგებულმა საზოგადოებამ ვის უნდა დაუჭიროს მხარი არჩევნებში?

– მე კარგად იცი ვისაც მხარს დავუჭერ, ვიქნები „ქართული ოცნების“ მხარდამჭერი მინიმუმ ერთი წელი, ზუსტად ვიცი, რომ არსებობს საფრთხე ხელისუფლებაში დაბრუნდეს ძალიან ბოროტი, ძალიან პრორუსული და ძალიან ცუდი ძალა და ამიტომ ვიქნები „ქართული ოცნების“ მხარდამჭერი.

– პრორუსულებში „ნაციონალებს“ გულისხმობ?

– კი... მე პირადად და ჩემი მეგობრები, ვიქნებით მოწოდების სიმაღლეზე, ყველაფერს გავაკეთებთ მთელი ეს წელი, რომ ნაცმოძრაობას კოვზი ჩავუგდოთ ნაცარში.

– კახიძეზეც მომიყევი, როგორ დაიწყო დაპირისპირება?

– ოთარ კახიძე არის აბსოლუტურად ნაძირალა ადამიანი, ის არის გაბანძებული პოლიტიკოსი, ფსევდოიურისტი, ეს არის იურისტი, რომელმაც სტრასბურგში იმის გამო შეიტანა საჩივარი, რომ ვანო მერაბიშვილის ფულის კომპენსირება მოეთხოვა ქართული სახელმწიფოსგან. რაც ამან აკადრა ემიგრანტებს მხოლოდ იმის გამო, რომ ემიგრანტებს ჰქონდათ განსხვავებული პოზიციები, მაგალითად გიორგი გახარიას დაუჭირეს მხარი - ესეც საკმარისი, მივხვდეთ, ვინ არის...

– იმ ვიდეოებში საჯარო მოხელეები მართლაც იყვნენ.

– მაგას არა აქვს მნიშვნელობა, არ უთქვამთ მათ, რომ მე ვარ ემიგრანტიო. ოთო კახიძემ მოიტყუა პირდაპირ ეთერში, ემიგრანტები არიან დაქირავებულებიო. როგორ ვუწოდო ამ ადამიანს პოლიტიკოსი?

რაც შეეხება ჩემს ინციდენტს. ამ ადამიანს აქვს თმენის ვალდებულება, არის პარლამენტარი და საპროტესტოდ მოსულ ადამიანებს უწოდა ნაძირლები და გვეუბნებოდე მოგივლიანო. ასეთი ადამიანები, როგორიც არის ოთარ კახიძე და გიორგი კანდელაკი, საერთოდ უნდა იყვნენ გარიყული პოლიტიკური სპექტრიდან და ქართული ოცნებაც ამისკენ უნდა იყოს მოწოდებული. „ქართული ოცნება“ პირიქით, ამათ შენიშვნებზე გულის წასვლის ეფექტი აქვთ. კი არ უნდა შეგეშინდეს  და უკან დაიხიო, პირიქით, უნდა იყო მაგრად, მთასავით უნდა ედგე ასეთ პოლიტიკურ ძალებს, უნდა გადაუდგე.

მე ოთარ კახიძეს ვანახებ ვის მოუვლიან, მართლა ვანახებ.

-  და ბოლოს, რამეს ხომ არ დაამატებ?

- დავამატებ იმასა რომ, „ალია“ ხანდახან ძალიან მაბრაზებს, მაგრამ რადგან სახელისუფლებო პოზიციებს ვაჟღერებ, უნდა გაგიხარდეთ,  რომ მაბრაზებთ, ანუ, ხართ კარგი, კარგი ოპოზიციური მედია, გარდა ამისა, ხართ ღია ყველასთვის და ამას ძალიან ვაფასებ, მოგესალმებით და გისურვებთ წარმატებებს.

 

თამო კეშელავა

ალია №1